瑞士歎慢板半和抗捷克|東方日報

今晚歐國聯A2組首輪賽事，捷克主場迎戰瑞士。捷克射手柏德列舒希克因傷落選，對進攻影響甚大，瑞士一向擅打守勢波，唔識踢主攻，加上初段例必保守，半場和不妨再追。（周五凌晨2時45分開賽）

捷克雖有韋斯咸孖寶華迪美高法蘭及湯馬士蘇錫克壓陣，但王牌射手柏德列舒希克因傷未有入選，佢哋向來靠呢位利華古遜箭頭數胡，冇咗佢差好遠。除此之外，連般尼前鋒馬迪維達都冇份，只靠古查達及新仔阿當荷路錫擔大旗，兩人為捷克披甲夾埋入得一球咁大把，真係靠唔住。

「十字軍」踢法保守
另一邊廂，瑞士陣容比較完整，法比安舒哈、格列沙加、梳頓沙基利、史堤芬蘇巴、比列安保路及施費洛域等悉數入選。「十字軍」對親強隊常有佳作，上年歐國盃曾淘汰法國，早前世盃外更力壓意大利，喺分組賽首名出線，皆因佢哋防守極有紀律，每每等啱時機策動反擊，呢招對強隊頗為奏效，不過面對實力次一級嘅對手，反而唔識得點樣做主動進攻，就暴露出老鼠拉龜嘅問題。

雖然如此，瑞士無論對住乜嘢對手，都會以穩住防線為大前提，尤其於比賽初段例必保守，無論對手係英格蘭定科索沃。連同熱身賽在內，瑞士近4仗半場都同敵軍握手言和，預計今仗作客捷克初段亦會陷於膠着，半場和捧得過。