聖莊士東入球細好路|東方日報

今晚平安夜以蘇超為主打，其中一仗由些路迪主場迎戰聖莊士東。榜首些路迪整體實力無疑秤先，但聖莊士東表現令人驚喜，近6場聯賽保持不敗，包括擊敗另一支傳統勁旅格拉斯哥流浪，預料今仗唔會太輸蝕。考慮到聖莊士東近12場聯賽有11場總入球開3球或以下，可博中位數3.5球嘅入球細。

（周六晚8時30分開賽）

蘇超傳統上由些路迪同格拉斯哥流浪雙雄爭霸，今季亦唔例外，些路迪目前積分上有明顯優勢，搶分逼切性並唔高。事實上，呢支上季蘇超冠軍即使保持聯賽10連勝，但近4場都係淨贏1球，總入球都係3球或以下，爭勝鬥心似有所放緩。加上些路迪剛於周四凌晨同利雲斯頓交鋒，匆匆再戰，球員未必恢復十足體力。

近6場聯賽不敗

聖莊士東近6場聯賽取得4勝2和，代表作一定係以2比1擊敗格拉斯哥流浪，可見佢哋面對傳統勁旅都冇怯場，有助提升今仗搶分信心。聖莊士東今年10月對些路迪亦僅輸1比2，而且係踢到補時5分鐘先至失第2球落敗，戰情非常緊湊。聖莊士東近期狀態更勝當時，有力同些路迪抗衡，揀入球細更抵玩。