巴塞啞火迎馬體會細均力敵|東方日報

今晚西甲重頭戲，巴塞隆拿主場火併馬德里體育會。巴塞榜首優勢明顯，搞到近期走勢放緩，近3仗冇波入，對住聯賽6連勝嘅馬體會，肯定加倍謹慎；馬體會作客魯營亦唔介意踢守勢波，近5次交手4次開2球或以下，2.5球入球細乃不二之選。（Now632周日晚10時15分直播）

兩軍聯賽失球最少
巴塞早前喺西班牙盃慘吞皇馬4蛋出局，之後兩場聯賽先後悶和基羅納同基達菲，好在佢哋喺聯賽遙遙領先，影響不大，今晚對住「3哥」馬體會，相信主帥沙維會較為重視，叫班球員醒醒定定。巴塞今季踢出超強防守，聯賽29仗僅失9球，門將達史特根有22場「零封」對手，有望打破西甲失球最少紀錄，但同時間佢哋進攻亦走樣，羅拔利雲度夫斯基近14場有11次食白果，狀態低迷，想入波有難度。

馬體會出名防守力強，聯賽失21球僅次於巴塞，雖然佢哋近11仗9勝2和甚弗，不過想喺魯營贏波唔容易，加上馬高斯洛蘭迪同干度比亞停賽，預計悶戰居多，入球細穩陣。