Willhappy：不再李輸十成 狐狸勢爭升班_星島日報

上季從英超降班嘅李斯特城，季前有主力如占士麥迪臣、蘇恩古、哈維班尼斯等離隊，但仍能以7勝1負21分喺本輪前英冠排榜首，究竟狐狸有啲咩行動令佢地暫時站係英冠之巔？

李斯特城今年夏窗大執位，前中後都有變動，後面先收購有英超經驗嘅高亞迪，亦都借左高雲地利既後生左閘哥林杜爾，可以話有唔錯嘅補充。中場鐵三角，重心一定係來自熱刺嘅哈利雲克斯同埋從車路士外借意大利新星卡沙迪，中線做波質素的確提升唔少。前線人才一定係最多，既有阿仙奴出身並踢咗蒙彼利埃一段時間嘅馬維迪迪，又借入加拉塔沙雷嘅左腳仔尤尼斯阿克根，再配合年輕小將基斯麥卡迪亞及伊沙赫古。

領隊一職就改聘了曾執教曼城青年軍嘅馬利斯卡，為何要談及佢嘅曼城血統？原因很簡單，又係將一隻閘收入中間組成3223陣式，而呢個位置都係交由列卡度佩雷拉去做，以前英超睇到佢嘅賣點都係衝入禁區嗰一下嘅突襲，但而家將佢擺前一格做波，正正有利於新陣式同踢法。同時亦要提到中場，哈利雲克斯經常逗後幫手組織，而尼迪迪則被擺前一格改造成box to box，效果亦唔錯，防守時又可以作第一道防線。前線方面，伊恩拿祖打頂嘅能力的確有進步，可以創造機會比後上中場入楔，今季他合共創造6個入球機會全英冠第一，進攻能力真係可見一班！

至於防守，雖然8戰失5球仍係英冠最少，但始終一對中堅菲斯及韋斯達加特仍然令人唔係好放心，不過李斯特城始終整體球員質素較高，加上板凳深度足夠，絕對足夠升班，今年一於貼狐狸衝超成功。Willhappy