Willhappy：B費獨力難支 紅魔難食拖肥糖_星島日報

今個星期完咗國際賽，五大聯賽隨即展開，不經不覺已經踏入季中嘅階段，唔少球隊都開始上力，表演越來越出色，其中一隊必定係愛華頓。

拖肥糖剛剛國際賽期間違反FFP被扣10分，不少人都認為佢哋會變成降班大熱，但我不敢苟同，因為扣完10分依然仲有4分，同護級線只係差2分，仲要剛剛4場不敗，3勝1和嘅戰績。大家都話護級隊最重要入波，而今年都真係入到唔少波，卡維特利雲已入4球，杜哥利都有3球進帳，戴治往往為人詬病嘅入球能力，都得到解決。

反之曼聯就認真頭痛，近5場就只係贏得2場，對手只係富咸同盧頓，都係僅贏一球。今季最大問題絕對係鋒線問題，海倫都係歐聯入波，但聯賽就啞火，繼續水土不服，福仔今季冇埋影，只有1入球1助攻，表現認真唔好。咁惟有繼續睇般奴費南迪斯可以持續到幾耐，靠佢精準嘅傳波或一腳天外飛仙，究竟可以救到曼聯幾多次。

愛華頓對曼聯精彩嘅原因絕對係雙方前線既攻擊能力，邊隊會入到波？同時愛華頓扣完10分，士氣可唔可以繼續保持定係一沉不起？所以呢場波絕對不容忽視，小弟決定推介主勝。Willhappy