专家拆局：抢分博反弹里昂尼姆大驳火

周六凌晨法甲独脚戏，里昂主场斗尼姆。里昂虽然连续2场作客联赛失分，不过主场出击始终有一定威力；尼姆开季3战入7球，攻击力都唔失礼，作客有本钱斗攻，首选中位数2.5球大盘。

里昂近2场联赛分别作客打和波尔多及输畀蒙彼利埃，不过里昂对上3次斗尼姆全部赢晒，而且今季联赛首战亦喺主场大胜迪安4比1，为求反弹抢分，主场出击唔可以睇小。被多间球会睇中嘅中场艾奥亚，上场领红牌被逐，今仗坐波监，好彩上仗后备上阵嘅荷兰前锋迪比及穆沙迪比利应可复任正选，其中今季已攻入4球嘅迪比过去3次斗尼姆，个人独取3个入球，明显脚风特别顺，今场又係数胡好时机。

尼姆踢法进取

尼姆开季3战1胜2负，表现唔算标青，不过佢哋3场联赛加埋入7球，当中由6名球员射入，足见佢哋踢法进取全民皆攻，最难得係尼姆唔会因为对手太强而改变踢法，好似上场对住现排榜首嘅雷恩都冇退缩，结果合力炮製6个士哥输2比4，预计今场有机会再出现大手交易，大盘咪走宝。