皇馬十“拿”九穩

    皇馬十“拿”九穩

    西甲雙雄分途出擊，榜首皇家馬德里作客奧沙辛拿，皇馬新敗損士氣，幸人腳實力仍佔盡優勢，皇馬作客鬥頹勢的奧沙辛拿有力爭勝。巴塞羅那主帥錫迪恩領軍倒戈畢迪斯，贏波洗頹不容易。

    皇馬西盃出局，廿二場不敗兼九連勝走勢告終，士氣受挫。不過皇馬今戰作客奧沙辛拿，人腳實力仍有優勢，賓森馬領軍高斯、雲尼斯奧進攻，F華維迪、摩特歷等支援，皇馬鋒線牌面十足。拉莫斯連同復出的高圖爾斯把關，或有望為防線重拾穩健。主隊近況麻麻兼兩連敗，雖然前線艾維拉、魯賓加西亞等表現不俗，但與皇馬整體有距離。皇馬作客有望順利重返勝軌。

    奧沙辛拿中場羅拔圖托里斯激勵球隊全力以赴：“皇馬是西甲最強之一，這場比賽肯定是艱苦的一戰，尤其球隊現時有不少傷兵。不過我相信只要我們能交出百分百實力，我們仍有能力為他們帶來麻煩。”

    巴塞唔易畢其功

    巴塞主帥錫迪恩領軍倒戈舊主畢迪斯。兩軍近況同樣一般，巴塞自錫迪恩上任後，表現未算穩定，上戰西盃輸波出局，吞下近五戰第二敗。論人腳巴塞今戰畢迪斯肯定佔優，惟比基停賽或令防線現缺口，美斯、迪比利、基斯文無態，為巴塞爭勝再添隱憂。畢迪斯近五戰主場贏過華倫西亞、皇蘇等勁敵，祖亞昆寶刀未老，配合摩朗、費基亞進攻，借主場之利或有力在巴塞身上搶分。