川崎前鋒開鑼戰派W|東方日報

新一季日職開鑼，今日傍晚揭幕戰川崎前鋒主場迎戰FC東京。川崎前鋒已於日超盃亮相，雖然0比2不敵浦和紅鑽，但整體發揮唔差，經過一場熱身後相信可回復舊觀；FC東京上季表現大幅下滑，退出爭標行列，今季換帥後處於重建階段，難寄厚望，加上雙方近5次聯賽交手前鋒全部勝出，熱捧川崎前鋒主勝。（有線661及601台周五晚6時直播）

衞冕日職嘅川崎前鋒上周喺日超盃登場，可惜於早段失守，其後全場搶攻未能收復失地，再於末段被紅鑽反擊得手，以0比2敗北，不過整場表現仍保持高水準，控球率接近7成。主力球員旗手怜央轉投蘇超些路迪後，由北海道札幌岡薩多簽入嘅「泰國美斯」猜拿迪普桑格辛擔任右中場，球員之間經過日超盃合作，預期今仗有更佳發揮，今場係開季主場第一擊，有望打響頭炮。

FC東京6名球員確診
FC東京上季表現令人失望，僅以第9名完成，球隊最大問題係演出不穩，上季最後階段有一場竟以0比8敗喺橫濱水手腳下，導致主帥長谷川健太下台。球隊今季由新潟天鵝挖角奧度拿達前來掌帥，呢位教頭曾經執教巴塞隆拿青年軍，相信會為球隊注入巴塞元素。不過FC東京正在重建，中堅渡邊剛外流比利時哥治，由降班日乙嘅大分三神簽入巴西中堅軒歷基泰維辛，踢法大幅改動亦有待適應，更不幸賽前消息指出，該隊有6名球員確診，勢必影響排陣，加上近年聯賽對川崎前鋒全敗，今仗爆冷機會極微。