阿仙奴反彈上盤贏到特|東方日報

今晚英超另一場倫敦打吡，阿仙奴主場迎戰賓福特。阿仙奴上仗取得2022年首場勝仗，信心返晒嚟，遇上作客腳仔軟嘅賓福特，誓要報番首循環一箭之仇，今場讓球盤阿仙奴讓1/1.5，上盤值捧。（ViuTV96及Now622周六晚上11時直播）

「6哥」阿仙奴踏入2022年開壞咗個頭，各項賽事首5仗只得2和3負，好彩上仗聯賽作客險勝狼隊1比0，成功止住跌勢。雖然前鋒加比爾馬天尼利今仗要坐波監，但休養多時嘅鐵衞富安健洋近日已復操，相信可隨時候命，值得留意嘅係，阿仙奴係今季唯一在角球中未有失波嘅英超球隊，並且藉住角球取得7個士哥，角球攻、守戰術都有顯著提升。

賓福特作客近績曳
季初頭威頭勢嘅賓福特，虛火一過陷入低迷，各項賽事近7仗只得1和6負，單計客場更錄得4連敗共失13球，作客表現差強人意，而冬季轉會窗簽入嘅丹麥中場基斯甸艾歷臣亦未必可披甲，加上射手艾雲東尼亦有傷在身，想反彈絕非易事。查實阿仙奴主場戰績不俗，11仗聯賽主場獲7勝2和2負，兩場敗仗係輸畀勁旅曼城及車路士，反映出佢哋主場遇弱有贏波保證，上盤捧得過。