蔚山搶先入球有金執|東方日報

星期日韓職賽事，蔚山現代主場迎戰新升班嘅金泉尚武，蔚山現代陣容鼎盛，被視為全北汽車霸業嘅最大挑戰者。蔚山現代係上季韓職「主場王」，新球季首戰當然會盡展威力，面對拉雜成軍嘅金泉尚武，有力趁對手未企穩陣腳佔甜頭，一於熱捧蔚山現代[第一隊入球]，當做過關變倍器。（周日下午3時30分開賽）

金泉尚武拉雜成軍
蔚山現代上季衝擊冠軍功虧一簣，季前組軍亦唔順利，李東俊、李東慶等離隊影響球隊爭標力量，板櫈深度雖然不足，但洪明甫率領嘅大軍正選仍然星味十足，卡沙舒韋利掛帥嘅鋒線仍具威力，蔚山現代上季主場只逢1敗，而且搶攻踢法令對手難以招架，對上4仗聯賽主場全部率先取得入球。

前身為尚州尚武嘅金泉尚武，陣中全由各隊服兵役球員外借而成，上季因由尚州遷往金泉而被判落K2比賽，但今季閃電升班重上韓職。金泉尚武被禁止引入外援，亦唔能夠出戰國際賽，因此球隊只係為名譽而戰，冇包袱下踢法進取，今仗重返韓職第一擊即面對強敵，早段未能適應下勢「交學費」。