祖記發維追第一隊入球|東方日報

另一場歐聯16強首回合，西甲「黃色潛艇」維拉利爾主場迎戰意甲勁旅祖雲達斯。維拉利爾以歐霸盃冠軍身分挑戰歐聯，能於小組賽出線已超額完成，進入淘汰賽只能盡力而為，論大賽經驗祖雲達斯肯定勝一籌，該隊近6仗歐聯5次先開紀錄，祖雲達斯「第一隊入球」值得再追。（Now644周三凌晨4時直播）

維拉利爾獲球證關照？
維拉利爾主帥艾美利外號「歐霸盃之王」，今季升格出戰歐聯亦交出好成績，喺F組緊隨曼聯之後次名出線。維拉利爾喺歐聯分組賽最後一場關鍵戰3比2險勝阿特蘭大，全隊打起信心，返本土賽再獲5連勝，主場表現尤其出色，近6仗主場4勝2和，包括0比0賽和皇馬，仲喺冬窗簽入盧施素，將會強陣迎戰「祖記」。今場執法球證施拔特原來係維拉利爾「貴人」，曾於兩次歐洲賽關鍵時刻，判12碼畀「黃色潛艇」，今場隨時又有「關照」，「祖記」唯有以快打慢。

祖雲達斯現時排意甲第4，佢哋最大目標始終係歐聯，喺主帥阿里基回巢領軍下，「祖記」喺H組力壓衞冕嘅車路士，以首名出線，冬季轉會窗更斥資超過8,000萬歐元簽入塞爾維亞入球機器杜辛華荷域，目標明確，就係要問鼎歐聯寶座。「祖記」近6仗歐聯5次先開紀錄，今仗面對歐聯淘汰賽經驗不足嘅維拉利爾，應該搵到着數，祖雲達斯「第一隊入球」有計。