西維爾大炮發維追榜首|東方日報

今晚西甲賽事，艾拉維斯主場迎戰西維爾，西維爾正追趕榜首皇馬，至於艾拉維斯要護級搶分，各有所求下，今場肯定爭持激烈。西維爾實力較強，但艾拉維斯近期入得又失得，近4仗全開3球或以上，2.5球嘅入球大捧得過。（Now632周六凌晨4時直播）

西維爾上仗喺塞維利亞打吡戰2比1擊敗貝迪斯，企穩西甲次席，同榜首皇馬相差6分，拿傑迪錫上場有士哥，今場當然要乘勝追擊。由曼聯外借嘅安東尼馬迪爾早前受傷，今仗上陣成疑，其位置由安尼斯利取代，至於祖利斯古迪同奧甘波斯皆可復出，料可強陣出擊。

艾拉維斯入得又失得
艾拉維斯今季喺下游掙扎，要積極搶分，射手祖斯奴聯賽累積12球，護級靠晒佢，冬窗由意甲加盟嘅干沙路艾斯卡蘭迪已融入球隊，並於上仗取得「士哥」，亦係球隊搶分重要棋子。

雖然西維爾實力較強，但首循環交手只係踢成2比2，加上艾拉維斯近期踢法開放，入得又失得，尤其防線薄弱，近4仗失9球，入球大更加值博。