屈福特勢頹阿仙奴W放心捧|東方日報

今晚英超頭場上演屈福特主場迎戰阿仙奴，位處降班區嘅屈福特上仗作客爆冷守和曼聯0比0，但其實比賽大部分時間捱打，只因紅魔球員把握力太差，先至逃過輸波厄運。以「大黃蜂」屈福特主場7連敗嘅頹勢，預料難阻阿仙奴全取3分，客勝值得信賴。（Now621周日晚10時直播）

大黃蜂主場7連敗
屈福特上月聘請74歲老帥鶴臣接手執教，但表現並冇明顯起色，鶴臣領軍下，6場英超僅獲得1勝2和3負，其中兩場主場先後0比2不敵白禮頓，以及1比4大敗於水晶宮腳下，可見呢位前英格蘭國家隊主帥並未能改善屈福特主場「腳軟」嘅弊病。因此，就算屈福特上仗作客喺曼聯身上取得分數，今仗返回主場可能打回原形。「大黃蜂」唔止主場7連敗，而且其中5場淨輸2球或以上，今仗隨時又大敗。

至於阿仙奴1月陷入低潮，但現時已經恢復狀態，取得聯賽3連勝，正在力爭打入前4位參加下屆歐聯，戰意有保證。布卡約沙卡、伊美路維等中前場球員近期輪流發威入波，球隊進攻多元化，足以撕開屈福特防線。加上雙方近6次對賽，阿仙奴取得5勝1和，今仗有力再下一城。