拜仁求勝心切吼半W|東方日報

薩爾斯堡作客差一截

歐聯16強次回合爭逐，拜仁慕尼黑將會喺主場再鬥薩爾斯堡。牌面較高嘅拜仁，首回合作客只能驚險逼和對手1比1，今仗回師安聯球場肯定傾盡全力。拜仁近年歐聯主場出擊踢法搶韁，今場有本錢藉地利發動「閃電戰」，喺比賽早段先下手為強，半場主勝好路。
（Now644周三凌晨4時直播）

大戰經驗豐富入局快
拜仁首回合靠京士利高文完場前入波，以1比1逼和薩爾斯堡，晉級形勢未明朗情況下，今仗主場肯定全力搶攻。頭號射手羅拔利雲度夫斯基，今季歐聯至今斬獲9球，配合基拿比同京士利高文等進攻好手提供支援，加上從新冠肺炎康復嘅老將湯馬士梅拿，拜仁前線搶攻能力夠晒保證。

呢支德甲班霸今季喺德盃早早出局，聯賽同歐聯更加不容有失，面對大戰接踵而來，今場歐聯當然希望早早鎖定勝局，免除後顧之憂。拜仁球員大戰經驗豐富，往往更快投入戰局，佢哋歐聯喺地頭作賽都相當搶韁，近5仗歐聯主場拎到4勝，而且4場都係上半場已經取得領先優勢。
薩爾斯堡作客表現明顯唔及主場，今屆歐聯4次作客僅取1勝1和2負，而且每場都有失球，後防並唔穩陣，加上中堅蘇勒因肌肉受傷倦勤，面對拜仁主場嘅猛烈攻勢，隨時由頭輸到尾，捧半場主勝更佳。