士砵亭踢法有前冇後 曼城騷哥利博半場大|東方日報

另一場歐聯16強次回合大戰，曼城返回主場再鬥士砵亭。首回合曼城作客大勝士砵亭5比0，雙方實力有明顯差距，今場「藍月亮」主場出擊，應該可以輕鬆贏多次，況且球隊喺歐聯賽場表現積極，慣性上半場即刻駁火，包括首回合半場攻入4粒，今場一於再追中位數1.5球半場大。（Now644周四凌晨4時直播）

曼城出戰歐聯一向唔留手，喜歡展示擁有歐洲勁旅威力，佢哋近5屆歐聯16強次回合，半場全開2球或以上。「藍月亮」首回合作客士砵亭，更係全無保留，憑馬列斯先開紀錄、貝拿度施華梅開二度，加上菲爾科頓建功，半場已經領先4比0，下半場再由史達寧「埋齋」贏夠5蛋，攻力非凡。返到英超，曼城上場「曼市打吡」輪到奇雲迪布尼發威，呢位指揮官交出2射1傳精彩數據，以4比1大炒曼聯，該仗同樣喺上半場已經領先2比1，踢到尾段更係練波咁款。曼城今仗留守主場出擊，球員唔使舟車勞頓，表現肯定更加醒神。

作客大反擊為尊嚴而戰
士砵亭首回合輸得難睇，次回合雖然反勝機會渺茫，但都要為尊嚴而戰；佢哋攻力其實唔差，但防線太多甩漏，踢法絕對稱得上入得又失得。士砵亭今屆歐聯分組賽6仗，有5次半場都開出2球或以上，今場捧1.5球半場大啱數。