兩隊鋒將死晒火 勝利船鹿角捱細界|東方日報

今晚日職獨腳戲，神戶勝利船喺主場迎戰鹿島鹿角。勝利船今季仍未打開勝利之門，除因老將多兼賽程頻密，攻力疲弱亦係關鍵，加上佢哋有亞冠後顧，今場或有所保留。不過鹿角表現飄忽亦係信唔過，寧捧中位數2.5球嘅入球細。

（有線661及601台周五晚6時直播）
由於勝利船下周中要出戰亞冠外圍賽對墨爾本勝利，因此近期需要多踢聯賽，至今已經出戰咗5仗，但竟然只得3和2負未贏過，包括上仗有恩尼斯達先開紀錄下，仍被廣島三箭逼和1比1，仲未打開勝利之門，淪落聯賽下游。

老將多節奏慢仲要留力亞冠
事實上勝利船陣中老將偏多，喺頻密賽程下，比賽節奏亦明顯偏慢，但最大問題係攻力唔掂；三大前鋒保贊、大迫勇也及武藤嘉紀「名氣響、能力低」，至今合共入得1粒咁大把，難怪呢5仗勝利船僅入過3粒，總入球4次開2球或以下，武藤嘉紀更因傷上陣成疑，攻力進一步受削。

鹿角開季後各項賽事，4戰取得2勝2負，唔算標青，其中近3仗開總入球2球或以下，包括上仗靠荒木遼太郎省中人改變方向嘅入波，先險勝柏雷素爾1比0，幸運成分居多，鹿角唔見得好過勝利船幾多。當然勝利船下周中要打亞冠，今仗隨時收起幾位主力球員，何況雙方近6次碰頭，鹿角只得1勝，今仗作客預計唔敢冒進，不妨向入球細埋手。