紅軍搶分洗劫白禮頓|東方日報

今晚英超早場安排白禮頓主場迎戰利物浦。陣中進攻好手如雲嘅「紅軍」，聯賽連場報捷走勢強勁，為繼續對榜首曼城窮追猛打，今場作客近況低迷嘅「海鷗」白禮頓絕不留手，有本錢反客為主，客勝不容錯過。（Now621及611周六晚8時30分直播）

今季各項賽事劍指冠軍的利物浦，早前擊敗車路士成功捧走英聯盃，令球隊士氣大振。上場歐聯16強次回合雖然輸畀國際米蘭，但無阻「紅軍」以總比數2比1成功晉級。當然利物浦絕對不滿足於此，球隊喺聯賽榜與「一哥」曼城嘅分差逐漸收窄，目前落後6分但少踢1場。為追逐榜首位置，「紅軍」眾將必然繼續努力。上場英超擊敗韋斯咸之後，利物浦聯賽已豪取7連勝，攻入19球並只失2球，出色表現有目共睹。

海鷗聯賽4連敗
以穆罕默德沙拿及沙迪奧文尼為首嘅利物浦鋒線，繼續係球隊搶分嘅保證，而冬窗加盟嘅路爾斯戴亞斯，早前成功斬獲個人聯賽處子入球，迅速證明自己有能力喺英超立足。相反上場以1比2不敵紐卡素嘅白禮頓，近4場聯賽全敗，而且只攻入1球，今場遇上氣勢如虹嘅「紅軍」，恐怕白禮頓難以招架，客勝屬信心之選。