阿仙奴勒唔住Ｗ畀李睇|東方日報

近期愈戰愈勇嘅阿仙奴，今晚主場迎戰「狐狸」李斯特城，「兵工廠」向住前4席位衝刺，目標鮮明下已豪取4連勝，主場出擊信心十足。李斯特城今季作客演出差勁，王牌前鋒占美華迪再度受傷更係重大打擊，造訪酋長球場難望搶分，一於熱捧主勝。（Now621周一凌晨零時30分直播）

阿仙奴喺前4爭奪戰中處於有利位置，馬田奧迪加特、布卡約沙卡及加比爾馬天尼利等刮起「青春風暴」，近10場聯賽獲8勝1和1負，球員信心爆棚。佢哋主場出擊氣勢特別強勁，過去9仗聯賽主場贏7場，當中有5場保持不失，攻守發揮高水平，值得信賴。

李斯特城作客腳軟
李斯特城今季成績令人失望，長期徘徊中游位置，近期隨住王牌占美華迪復出有番啲起色，但「華Dee」日前再度受傷要抖一個月，「狐狸」隨時打回原形。李斯特城作客演出尤其令球迷擔心，佢哋近7場聯賽作客只贏一仗，其中5場被攻入2球或以上，疲弱防守力難以招架阿仙奴進襲。況且李斯特城周中踢完歐協聯，體力亦及唔上主隊，今場凶多吉少，主Ｗ熱得有理。