連贏兩場士氣正盛 狼隊翻生主W值追|東方日報

周六凌晨英超獨腳戲，狼隊主場迎戰列斯聯。今季表現出色嘅狼隊，捱過2月底開始嘅低潮期後，近期逐漸回復勇態，仍然有機會爭逐來季歐洲賽資格。作客嘅列斯聯狀態持續低迷，新帥馬殊上任未見太大起色，喺護級壓力下更顯得焦急，今仗作客信唔過，捧主勝。(Now621周六凌晨4時直播)

狼隊今季以實而不華踢法取得佳績，防守穩健令失球數字偏低，雖然上月底開始曾經歷3連敗，不過近兩仗連贏屈福特同愛華頓，而且兩場都保持不失，顯示球隊已「回復正常」。狼隊自柏度尼圖重傷復出後，進攻能力亦見提升，上一次主場出擊就以4球大破屈福特，今仗喺地頭再戰值得睇好。

列斯聯易帥未見起色
列斯聯今季飽受傷兵困擾，名帥比爾沙亦烏紗不保，美國教頭馬殊上任表現未見起色，上仗雖然補時絕殺諾域治，終止6連敗頹勢，但就算面對包尾球隊，贏波過程仍欠說服力，而且列斯聯作客成績差勁，近3仗作客全敗兼吞10隻蛋，作客狼隊難望搶分。