古天奴當弗維拉大鬥兵工廠|東方日報

英超周六早場大戰，阿士東維拉主場迎戰阿仙奴，兩隊近期各自搵到啱踢嘅進攻模式，攻擊力得到大大提升，而且兩隊進攻靈魂菲臘比古天奴同馬田奧迪加特狀態大勇，今仗交鋒勢必激烈駁火，2.5嘅入球大穩開！（ViuTV96、Now621及611周六晚8時30分直播）

維拉自從謝拉特執教後止跌回升，1月借用巴西中場菲臘比古天奴，更加打通進攻嘅「任督二脈」，呢位天才球星8場比賽有4個入波同3次助攻，連帶中場積及藍斯、前鋒丹尼艾格斯同奧尼屈堅斯亦頻頻入波。維拉在主場出擊尤其進取，近7仗主場有6次總入球開出3球或以上。
阿仙奴作客照攻

阿仙奴周中英超主場0比2不敵利物浦，不過球隊演出其實唔差，依家仍排聯賽榜第4位，領先第5位嘅曼聯1分，但少踢2場，為保前4不容再失，好在佢哋聯賽作客4連勝，4仗合共攻入13球，挪威中場馬田奧迪加特演出八面玲瓏，今仗作客亦會繼續主攻，同維拉必定快上快落踢開放足球，捧入球大穩陣。