歐洲區附加賽4強駁火 葡萄牙做大騷|東方日報

今晚4場世盃外歐洲區附加賽一觸即發，其中最受關注嘅，梗係同處C組嘅意大利及葡萄牙，能否齊齊贏波於決賽碰頭。因應俄羅斯入侵烏克蘭，原本要出戰波蘭嘅俄羅斯被「DQ」，令波蘭自動進身B組決賽，而烏克蘭原定對蘇格蘭嘅A組賽事亦獲延期。除歐洲區外，亞洲區及南美洲區世盃外亦連場大戰，球迷千祈咪錯過！

今晚附加賽C組矚目大戰，葡萄牙主場硬撼土耳其。葡萄牙今次因傷病問題未能「夫添」出擊，但喺多位「英超兵」壓陣下，攻力依舊強勁，加上近7場世盃外有6場開3球或以上，面對攻強守弱嘅土耳其隨時大手交易，2.5球入球大值得一試。（有線661及601台周五凌晨3時45分直播）

葡萄牙分組賽最後一場陰溝裏翻船，以1比2倒輸畀塞爾維亞，將直接出線資格拱手相讓，只能以次名轉戰附加賽。佢哋今個國際賽期遇着傷兵及停賽潮，一對正選中堅魯賓戴亞斯、比比，以及中場連拿度辛捷士均缺陣，不過25人大軍中依舊有9位英超球星壓陣，包括基斯坦奴朗拿度、般奴費南迪斯及迪亞高祖達等進攻好手，火力唔使懷疑，其中Ｃ朗力爭第5次亮相世盃決賽周，鬥志必盛，既然防線唔齊腳，倒不如全力搶攻爭取晉級。

土耳其踢法有前冇後
土耳其舊年9月改由前德國U23領隊根斯執掌，分組賽最後4輪取得3勝1和，得以力壓挪威以次名殺入附加賽。球隊喺分組賽防守未如理想，10戰失咗16粒，包括作客曾以1比6大敗畀荷蘭。不過佢哋同樣勝在火力強勁，分組賽轟入27球，唔赦同葡萄牙鬥攻，大盤不容錯過。