踢風流波阿根廷玩大佢|東方日報

聽朝世盃外南美區上演一場例行公事，阿根廷主場對委內瑞拉。阿根廷已經提早出線，今次仍召入美斯等多位進攻主力，寓賽於操，包尾兼已出局嘅委內瑞拉冇晒包袱，2.5球嘅入球大乃不二之選。（周六早上7時30分開賽）

阿根廷依家有35分穩站次席，已經提早取得世盃決賽周入場券，雖有基斯甸羅美路、盧施素、達米安馬天尼斯及貝安迪亞坐波監，不過陣容依然星光熠熠，徵召迪馬利亞、拿達路馬天尼斯等歐洲兵，連同隊長美斯亦重返大軍，攻力有保證。阿根廷在史卡朗尼帶領下，自2019年7月起29場比賽中，依然保持不敗，今場對住委內瑞拉，可趁機試陣為世盃練兵。

委內瑞拉包尾冇包袱
相反，委內瑞拉乃包尾大幡兼提早出局，陣中只有愛華頓前鋒荷西朗頓，以及森多利亞中場湯馬士連干較為出名，該隊上年年尾請得柏加文執教，佢唔單止協助哥倫比亞於2014年世盃殺入8強，再之前亦教過阿根廷國家隊，佢亦係當年一手提拔年輕嘅美斯入「潘帕斯雄鷹」。呢位老帥上任首仗即大勝玻利維亞4比1，但上仗對烏拉圭卻慘敗1比4，可見佢都係崇尚進攻，既然已經出局不如放手一博。加上委內瑞拉近8仗有7次開3球或以上，入球大不容錯過。