一隊保守 一隊啞火 狼隊紐記博半和|東方日報

今晚英超獨腳戲，紐卡素主場迎戰狼隊。紐卡素近況差勁，返主場一定力爭重回勝軌，狼隊今季繼續保持出色防守力，加上作客一向穩打穩紮，實力不容忽視。雙方近4次交手，半場全部未分勝負，捧半場和着數。

（Now621周六凌晨3時直播）
狼隊最近表現回勇，上場主場2比1擊敗阿士東維拉，近4場贏咗3場，爭取來屆歐洲賽席位仲未絕望。佢哋一向擅長踢防守反擊，雖然入波唔算多，但勝在防守夠穩陣，今季31戰只係失咗27球，尤其作客往往踢得更保守，等到下半場先再搵機會偷雞。狼隊首席射手魯爾占美尼斯今場繼續「坐波監」，主將魯賓尼維斯又因傷缺陣，預計會做好防守先。

「喜鵲」連續4戰開半和
紐卡素上仗先開紀錄下，最終1比5慘敗畀熱刺，以1勝3負結束連續4場嘅作客之旅。「喜鵲」最近攻力麻麻，近3場只入1球，當中兩大主力射手基斯活特、辛特麥斯明，踏入2022年後聯賽加埋只入得兩球，成為球隊啞火嘅最大原因。「喜鵲」攻力不足下，今場未必會冒險進攻，睇番佢哋近4場半場都同對手打成平手，半場和值得再追。