阿特蘭大求穩吼半細|東方日報

今晚阿特蘭大喺主場同RB萊比錫上演歐霸盃8強次回合激鬥，首回合踢成1比1，反映實力差距唔大，預計兩隊會踢得保守。睇番RB萊比錫近7場歐霸作客，半場全開1球或以下，一於熱捧1.5球半場細。
（Now643周五凌晨零時45分直播）

RB萊比錫防守硬淨
阿特蘭大首回合作客表現唔曳，一度憑前鋒路爾斯梅利爾先開紀錄，可惜隨後沙柏哥斯達解圍變「擺烏龍」，唔能夠將領先優勢帶到次回合。不過呢支意甲「藍黑兵團」今季演出飄忽，上場不敵薩斯索羅後聯賽兩連敗，已經跌到落第8位，來季踢歐洲賽機會渺茫。一向以火力強勁見稱嘅阿特蘭大，近期陷入啞火困局，近6場只入得5粒，主力射手杜雲沙柏達傷愈後狀態未足，半場未必夠膽壓得太前。

RB萊比錫首回合其實有權贏埋，但前鋒安達施華起腳中柱，加上12碼宴客，只能夠同對方打和。呢支德甲前列分子近況唔錯，上場贈賀芬咸3蛋後，近12場賽事未輸過，當中要歸功出色防守，佢哋近4場只失兩球，聯賽失球數字亦僅次榜首拜仁，今晚作客會先求穩陣，專心做好防守，到下半場伺機而行，1.5球半場細值得捧場。