熱刺夠搶韁半場主勝收禮|東方日報

今晚英超頭場係火力全開嘅熱刺，主場撲擊白禮頓。熱刺近況勇猛，為鎖定前4位置，主場出擊唔會留手，球隊近4仗3次半場領先夠搶韁，今場對手白禮頓目前無欲無求，戰意成疑，熱刺一周一賽體力夠晒，可以半場ＫＯ「海鷗」，捧半場主勝。（Now621周六晚7時30分直播）

熱刺上仗憑孫興民上演帽子戲法，作客4球大炒阿士東維拉，豪取4連勝。佢哋近7仗聯賽狂轟25球，前線三叉戟哈利卡尼、古路施夫斯基及孫興民，狀態火熱兼默契愈來愈好，今季暫時合共累積32個入波及20助攻，攻力唔使懷疑。

依家前4爭逐緊湊，熱刺比車仔、阿仙奴同曼聯着數嘅，係佢哋嚟緊4輪都係一周一賽，相反上述3隊周中都有快車，而且車仔同阿仙奴仲要正面對撼，熱刺可以印印腳剝花生睇戲。

白禮頓攻力疲弱難偷雞
白禮頓上仗作客爆冷以2比1險勝阿仙奴，終止聯賽7場不勝頹勢，中場美維樸貢獻一入球及助攻，成為最大功臣。不過佢哋今季攻力奇差，31戰只入28球，近8場賽事更只入3粒，首席射手馬奧比連續7仗食白果，上仗更被貶為後備，作客難望偷雞。首循環交手白禮頓半場已經落後，熱刺今仗相信會繼續積極搶攻，有利開出半場主勝。