阿仙奴爭前４憑鬥志搶Ｗ|東方日報

近期演出「走樣」嘅阿仙奴，今晚作客同樣低迷嘅修咸頓。「兵工廠」力衝前4席位，已經冇乜失分空間，佢哋班球員質素遠勝對手，有望大踢翻身波；「聖人」冇嘢好爭似等緊收咧，鬥心成疑，捧客勝穩陣。（Now622周六晚10時直播）

修咸頓冇目標等收咧
阿仙奴原本喺前4爭逐處於有利位置，但近期接連輸畀水晶宮同白禮頓後形勢逆轉，依家踢少一場下落後熱刺3分，嚟緊唔可以再失分。「兵工廠」近期因傷患問題變陣，影響球隊發揮，不過佢哋就算輸波，至少仲展現出頑強鬥志，加上近6場聯賽作客錄5勝，有望及時反彈。

修咸頓係目前英超狀態最曳球隊之一，近6仗僅得1和5負，上輪狂吞車路士6蛋後主場已經4連敗，球員喺冇明確目標下，鬥心同士氣都難有保證，今仗難阻急於搶分嘅阿仙奴。