靠華Dee食胡李斯特城嗒糖|東方日報

英超頭輪仲有一場激戰，「狐狸」李斯特城主場火併「拖肥糖」愛華頓。兩隊今季表現同樣令人失望，不過李斯特城唔少傷兵近期已經陸續復出，實力大幅提升，主場出擊必定力爭踢出爭氣波；相反愛華頓愈踢愈頹，暫時仍處於降班區，加上球隊近7仗聯賽作客全敗，睇見都唔開胃，寧願博主勝。（Now623周日晚9時直播）

李斯特城上場聯賽作客1比3不敵熱刺，不過要留意「狐狸」為備戰周中嘅歐協聯4強，特登收起韋斯利科芬拿、哈維班尼斯等主力，輸波無可厚非。其實李斯特城今季主場成績甚有保證，近4仗聯賽喺皇權球場出擊，錄得3勝1和佳績，當中更只失兩球，加上首席射手占美華迪早前正式傷愈復出，今仗值得被睇高一線。

愛華頓作客例腳軟
愛華頓上仗聯賽憑李察利臣建功，主場爆冷一球小勝車路士，近3仗聯賽終嘗勝果。「拖肥糖」暫時仍喺降班區苦苦掙扎，最主要原因係佢哋作客成績相當不濟，今季16次作客僅得1勝，當中更失咗35球，今仗不宜高估。雪上加霜係巴西射手李察利臣，上場聯賽將煙花掟上看台，隨時面臨停賽3場刑罰，攻力進一步受影響。首循環交手，「拖肥糖」早早落後之下，直至補時階段先至追平，今仗睇嚟難有勝算，主勝值得秤先。