搶常規賽冠軍墨城大開殺戒|東方日報

今日澳職獨腳戲，墨爾本城（白衫）硬撼威靈頓鳳凰。雙方已穩奪季後賽入場券，墨城今仗要贏波先攞到常規賽冠軍，戰意比鳳凰為高，近年碰亦經常大手交易，3.5球入球大更值博。（myTVSUPER周一下午5時05分直播）

墨城早前於亞冠分組賽6戰不敗下仍被踢出局，上周返回聯賽爆冷輸畀包尾大幡珀斯光輝0比2，25次射門都入唔到波，明顯有疲態，今仗係佢哋常規賽煞科戰，依家落後已打晒26輪嘅榜首墨爾本勝利2分，但只要贏波便可壓倒同市死敵封王，相信會搏埋佢。墨城有射手榜1哥占美麥卡倫及快翼納博特助陣，於聯賽共入53球冠絕群雄，攻力毋須懷疑。

威靈頓鳳凰防守欠穩
另一邊廂，鳳凰隨住上周中險勝西悉尼流浪者2比1，已鎖定前6嘅季後賽席位，今仗留力唔奇，要留意鳳凰防守欠穩，近8仗共失20粒，只有兩仗冇失波，加上有所鬆懈下，隨時中門大開。翻查紀錄，雙方近3次聯賽碰頭，合共炮製15球，全開4球或以上，主W賠率冇肉食，轉捧3.5球嘅大盤更划算。