贏波封王歡送坦哈格 阿積士半場派大禮|東方日報

周中荷甲焦點大戰，榜首阿積士主場迎戰海倫芬。近況一般嘅海倫芬，為爭取來季歐協聯外圍賽資格不容有失；至於實力秤先嘅阿積士今場只要全取3分，就可以提早一輪捧盃，戰意毋庸置疑，不過今場主勝賠率冇肉食，喺雙方都有搶分意欲之下，轉捧中位數1.5球半場大更實際。（周四凌晨2時開賽）

阿積士領隊坦哈格已確定今季完結後離開荷甲，轉教英超豪門曼聯，不過呢支荷甲勁旅軍心並未受到影響，近8場聯賽豪取7勝1和佳績。雖然上場作客2比2賽和阿爾克馬爾，但今場只要贏波，就能夠喺主場球迷見證下，提早一輪成就聯賽3連霸偉業，一眾球員今場一定全力搶攻，希望盡快入波鎖定勝局，將冠軍獎盃送畀坦哈格。

海倫芬想踢歐戰唔會縮
目前排第8嘅海倫芬上場作客2比1反勝維迪斯，士氣回升，瑞典前鋒阿明沙亞最近狀態火熱，近5場射入4球，相信今場會為阿積士帶來一定威脅。呢支荷甲中游分子近6場聯賽錄得3勝2和，6仗全部取得入波，踢法相當進取，為爭取來季歐協聯外圍賽資格，今場唔會退縮，預計會同阿積士進行火併。雙方對賽亦旺入波，翻查數據，佢哋近8次交手，有5次半場入球開出2球或以上，半場大值得捧場。