力爭升班！哈特斯打爆盧頓|東方日報

英冠升班附加賽4強首回合，聯賽排第6位嘅盧頓主場迎戰哈特斯菲爾德；雙方今季兩度交鋒，哈特斯菲爾德獲1勝1和成績，最後4場聯賽連勝更令球隊取得英冠第3位，球員狀態同士氣均處高峰，有力殺退盧頓先拔頭籌，客勝值博。
（有線661及601台周六凌晨2時45分直播）

近況托弗作客未驚過
哈特斯菲爾德喺2017年至2019年曾經升上英超打滾兩季，跌落英冠經過3年重建，終於踢出成績；左翼衞哈利托夫路、中場祖殊高洛馬，以及前鋒施拿尼等都成功上位，其中哈利托夫路喺近7場聯賽攻入5球，成為球隊一大武器。哈特斯菲爾德季尾狀態進入高峰，最近7場聯賽錄得6勝1和，包括最近豪取4連勝，勇態可克服今仗作客難題，值得信賴。

盧頓喺煞科戰順利鎖定第6位，勉強躋身升班附加賽，不過佢哋全季表現唔算特別「標青」，55個失球係聯賽前10隊當中最多，而且季尾8輪聯賽只得3場「煲魚生粥」僅勝1比0，顯示球員狀態並唔理想。哈特斯菲爾德實力同狀態更有保證，一於冷敲客勝。