賓福特上岸唔阻愛華頓搶分|東方日報

英超周日晚多支護級球隊分途出擊，其中愛華頓將會主場迎戰賓福特。「拖肥」近期表現回勇，尤其主場多次面對前列強敵都成功搶分，今場面對已經成功「上岸」嘅賓福特，無論戰意或狀態都更勝一籌，一於吼實主勝。（Now621周日晚11時30分直播）

列斯聯白禮頓「大」鬥法
愛華頓賽前同排尾三嘅列斯聯相差2分，雖然踢少一場，但降班危機尚未解除，「拖肥」眾將今場為搶分當然唔敢怠慢。愛華頓喺領隊林柏特帶領下，季尾表現有起色，尤其主場發揮唔錯，近4次地頭出擊取3勝1和，而且只係失過1球，包括曾以1比0先後擊敗曼聯同車路士兩大前列分子，穩健防守固然係「拖肥」接連搶分嘅保證，前線李察利臣等攻擊手亦頗具質素。對手賓福特已經成功護級，今場已成例行公事，戰意肯定輸蝕，睇好「拖肥」乘主場之利全取3分。

同日較早時間開波，仲有列斯聯主場鬥白禮頓。上場慘吞車路士3蛋嘅列斯聯，聯賽遭遇3連敗護級形勢嚴峻，想喺聯賽尾段逃出生天，餘下兩場波冇得再失分。可惜今場丹尼爾占士及艾寧齊齊停賽，加上史超活達拉斯等主力因傷缺陣，球隊陣容天殘地缺，戰力成疑。白禮頓踢法進取，近4場全開3球或以上，包括上仗以4比0大勝曼聯，數胡能力有保證，今場誓再同搶分心切嘅列斯聯鬥攻，中位數2.5球入球大值博。（Now623周日晚9時直播）