國米望創奇迹半大有森得|東方日報

今晚另一場意甲煞科戰，國際米蘭主場迎戰森多利亞，國米想衞冕冠軍只得一個機會，就係今仗必須贏波，同時寄望A米落敗，先可以後上捧盃，老實講機會相當渺茫。不過國米攻力強橫，早段都會全力搶攻爭取入波，希望有奇迹出現。森多利亞已護級成功，冇心理包袱踢得更放，雙方近5次對賽上半場全開2球或以上，可博中位數1.5球嘅半場大。（Now643周一凌晨零時直播）

拿達路馬天尼斯腳風順
國米今季意甲37場入81球，屬聯賽之冠，前鋒拿達路馬天尼斯上仗對卡利亞里梅開二度，今季聯賽已經有21球進帳，腳風極順。雖然「藍黑兵團」爭標形勢被動，但今仗始終係主場謝幕戰，相信都會爭取漂亮勝仗向球迷交代。

森多利亞上場以4比1大勝費倫天拿，39歲老將加利亞雷拉都有進帳，甚至連後衞阿歷士費拉利都有波入，可見球隊嚟到季尾盡情娛賓，今仗亦唔會刻意防守，有利半場出現大比數賽果。