落後1球哈化焗攻大無畏|東方日報

德甲升/降班附加賽生死戰，漢堡主場迎戰哈化柏林。首回合漢堡作客領先1比0，挾5連勝氣勢返地頭出戰當然信心爆棚；哈化柏林護級之戰已無退路，今仗必定盡地一煲搶攻，預料雙方會製造大量攻門鏡頭，捧2.5球嘅入球大屬明智之選。（周二凌晨2時30分開賽）

過去9年德甲升/降班附加賽，有8次都係由德甲球隊贏出，不過喺煞科戰跌落德甲尾3嘅哈化柏林，首回合就輸波跌入絕路，今場將會義無反顧大舉進攻。事實上哈化柏林進攻能力唔差，首回合亦製造出唔少具威脅埋門，只可惜未能把握，以祖維迪、貝科迪爾等經驗豐富嘅前鋒，今場有望交出最佳水準力爭入波。

漢堡有地利唔怕駁火
漢堡季尾全速衝刺殺上德乙第3位，拎到附加賽資格，連同首回合贏波已豪取5連勝，首席射手基列素攛擾力強，有力衝擊哈化柏林疲弱防線。漢堡喺主場出擊向來踢法進取，而且火力十足，對上7仗主場賽事總入球全開3球或以上，今仗面對焗攻嘅哈化柏林，好大機會再演入球騷。