歐塞爾 聖伊天半場講和|東方日報

周五凌晨法國附加賽首回合大戰，法乙「三哥」歐塞爾主場挑戰法甲尾三球隊聖伊天。歐塞爾近況相當出色，不過要越級挑戰整體實力佔優嘅聖伊天，始終有一定難度。翻查數據，雙方近4次交手半場全部未分勝負，加上生死戰兩隊一定踢得穩陣，不妨再追半場和。
（周五凌晨1時開賽）

法乙三哥前線啞火
上季同升班附加賽只差一步嘅歐塞爾，今季捲土重來，成功以第三名衝過終點，佢哋季尾氣勢如虹，當中最後8場聯賽更加豪取6勝2和不敗佳績。

不過歐塞爾上場附加賽第2圈面對索察，雖然成場控制大局，但都唔能夠喺法定時間獲勝，最終要鬥到互射12碼階段先將對手淘汰，體力或會受到影響。況且一眾攻擊球員包括首席射手查邦尼亞，前線頻頻失機，今場承受一定壓力隨時再次啞火，半場未必拎到太大優勢。

聖伊天煞科戰憑老將夏蒙馬建功，作客1比1逼和應屆法國盃冠軍南特，兼以1分壓過輸波嘅梅斯，成功搶得尾三附加賽席位。呢支10屆法甲盟主最近表現麻麻，過去7場只得1勝，不過所面對嘅對手摩納哥、雷恩、尼斯等，大多屬於實力分子，輸波情有可原。聖伊天今季聯賽38戰狂失77球，失球數字屬法甲第二多，不過喺前曼城中堅文加拉季中加盟後，防守力明顯有改善，半場有力守和主隊。