眾星踢足全季現疲態 西葡均勢波和味濃|東方日報

歐國聯A2組今晚上演矚目大戰，由西班牙主場迎戰葡萄牙。「雙牙」不但係鄰國，而且足球風格接近，屬於傳統老對手，相當熟悉對方踢法，每逢交鋒往往勢均力敵，近4次對賽法定時間都握手言和，其中3場踢成0比0。考慮到兩隊球員剛經歷漫長球季，難免出現疲態，中位數2.5球嘅入球細固然可以一敲，和波回報高更值得捧場。（周五凌晨2時45分開賽）

西班牙係上屆歐國聯亞軍，領隊安歷基繼續重用「巴塞幫」，今次大軍名單有6人來自呢支西甲勁旅，包括隊長布斯基斯及左閘佐迪艾巴等。不過「鬥牛兵團」鋒線人腳比較薄弱，艾華路莫拉達把握力曳，費倫托利斯亦非正宗前鋒，想攻入葡萄牙大門，並唔容易。

至於2019年歐國聯冠軍葡萄牙仍然由C朗拿度擔大旗，但呢位37歲老將年紀已大，無復當年之勇，加上早前因傷缺席英超煞科戰，可能影響今仗發揮。C朗嘅曼聯隊友般奴費南迪斯今季狀態欠佳，加上佢踢國家隊表現一向打折扣，遇上有一定防守能力嘅西班牙，難有作為。

賽程緊密點到即止
睇番今個國際賽檔期，「雙牙」同樣要兩星期內踢4場歐國聯賽事，賽程非常緊密，難以每場都搏盡，或會點到即止。加上兩隊近4次交鋒，法定時間全部打和，今仗固然和味濃，而且近7次對賽有5次總入球係2球或以下，入球細亦值得支持。