奧地利心雄大起丹麥|東方日報

今晚歐國聯A1組次輪賽事，奧地利主場火併丹麥。兩軍首輪均爆冷贏波，其中奧地利喺「蘭Sir」蘭歷克接手首騷即大勝，心雄之下隨時鬥攻，2.5球入球大更可取。（周二凌晨2時45分開賽）

蘭歷克教出進取足球
奧地利同丹麥喺A1組同樣被人睇淡，點知兩隊首輪就踢出驚喜，啱啱離開曼聯、執起奧地利教鞭嘅蘭歷克，首度領軍即作客豪贈克羅地亞3蛋，令人喜出望外，奧地利全場13次射門堅進取，阿拿奧杜域與沙比薩均不意地遠射得手。蘭歷克教咗曼聯半季被球迷質疑「呃飯食」，勢估唔到轉教奧地利即嚟料，打出極具侵略性嘅逼搶戰術，「紅魔」成績曳似乎係班大帝唔聽佢支笛居多，「蘭Sir」絕對係無辜。

另一邊廂，丹麥首輪造訪衞冕嘅法國，喺先失一粒劣勢下，主帥賀文特當機立斷，一口氣換入3個球員，包括前鋒哥尼利斯及翼鋒丹斯加特，成功扭轉形勢，憑哥尼利斯梅開二度，以2比1反敗為勝，證明賀帥調動得宜。唔好忘記，自從中場核心基斯甸艾歷臣康復歸隊後，球隊創造力大為增加，絕對唔怕同你鬥攻。翻查紀錄，奧地利近5仗全開3球或以上，丹麥近15仗只有一場食白果，今仗捧大為妙。