瑞士韌力夠細抗西班牙|東方日報

歐國聯A2組第3輪矚目大戰，瑞士主場遇上西班牙，論牌面「狂牛兵團」當然高啲，不過瑞士主場出戰韌力十足，今仗有力對把握能力唔高嘅西班牙造成困擾，加上近年交鋒瑞士不落下風，今仗戰況隨時陷入膠着，2.5球入球細屬好路之選。（周五凌晨2時45分開賽）

瑞士雖然上場作客慘吞葡萄牙4蛋，不過佢哋喺首屆歐國聯曾殺入4強，球員擅於以整體性踢法同對手抗衡，經過上場壓得太前招致大敗後，相信今場會變番穩打穩紮。瑞士上屆歐國盃喺互射12碼先被西班牙淘汰，兩軍過去5次碰頭，總入球全開2球或以下，可見絕對無懼「狂牛兵團」。

「狂牛兵團」作客點到即止
西班牙喺安歷基執教下仍以控球踢法為主，不過艾華路莫拉達及費倫托利斯等前鋒把握力向來麻麻，令球隊經常出現老鼠拉龜情況，尤其作客比賽更加係「點到即止」，上年世盃外作客弱旅科索沃同希臘，亦只能小勝2比0及1比0，今仗面對韌力十足嘅瑞士，入球機會更少，細盤值博。