澳洲細盤曼無一失|東方日報

今晚展開U23亞洲盃8強賽事，頭場澳洲U23硬撼土庫曼U23。澳洲為冠軍而來，不過佢哋向來守強攻弱，面對鬥志頑強嘅土庫曼難佔甜頭，加上淘汰賽先求穩陣，博2.5球入球細最上算。
（周六晚9時開賽）

澳洲喺B組以2勝1和首名出線，主打4-5-1陣式防守效率甚高，富咸中場泰列斯法蘭斯高控制節奏出色，3場分組賽只失一粒，近4場全開2球或以下，不過今仗有前鋒夏蒙特坐波監，鋒力受削。土庫曼今屆首度躋身決賽周即殺入8強，佢哋喺A組以次名晉級，近兩仗都喺先落後情況下憑鬥志反勝及追和。土庫曼自知實力稍遜，今仗必死守再博偷雞，入球細有計。

烏茲別克搶韁吼第一隊入球
尾場東道主烏茲別克U23火併伊拉克U23。烏茲別克喺A組頭兩輪全勝，提早鎖定首名出線席位，尾輪收起多名主力仍以1比1打和伊朗，留晒力今場搏殺。烏軍喺呢3仗全部先開紀錄，其中兩仗更於上半場已取得領先優勢，甚為搶韁。伊拉克於B組頭兩輪全和，尾輪反勝科威特3比1，驚險以次名晉級，可惜佢哋防守同集中力麻麻，3輪分組賽全部都先失波，烏茲別克「第一隊入球」可敲。
（周日凌晨零時開賽）