澳洲鬥秘魯半和好路|東方日報

爭決賽周席位生死戰
世盃外附加賽矚目大戰，亞洲區代表澳洲將於中立場卡塔爾決戰南美洲勁旅秘魯，牌面上秘魯或高出半線，不過佢哋踢法向來守強攻弱，而被睇低嘅澳洲亦會屯重兵防守，務求穩住陣腳再伺機反擊。今仗中立場踢嘅係一場過生死戰，雙方都唔想有任何閃失，上半場多數睇定嚟踢，博半場和好路。（周二凌晨2時開賽）

比賽喺卡塔爾上演，澳洲上星期就喺呢個球場以2比1險勝阿聯酋，拎到踢呢場決戰嘅資格，適應上或者會有優勢。澳洲球員平均質素唔高，加上前鋒阿當泰加特仍受傷患困擾上陣成疑，入球能力受到削弱，今仗好大機會先踢穩陣波，尤其佢哋嘅球員平均年齡較輕，留前鬥後喺下半場搏殺或有更佳效果。事實上，澳洲近4仗半場全部打和，上半場要擊敗佢哋唔係易事。

秘魯入球能力偏低
秘魯喺南美洲區力壓哥倫比亞同智利，排第5名拎到附加賽資格，佢哋自從比沙路、荷西古里路等傳奇前鋒退役後，前線一直未有球星孭飛，今屆外圍賽只入19球，入球數排南美洲區尾3，突圍全靠一條可靠防線。秘魯上星期熱身賽對新西蘭，亦喺老鼠拉龜下憑下半場1個入波小勝1比0，今仗面對實力更強嘅澳洲，入波難度有增無減，半場悶和機會極高。