維拿迪馬愛華頓半和好路|東方日報

聽朝智甲獨腳戲，維拿迪馬愛華頓主場硬撼「1哥」高路高路。高路高路近期聯賽明顯跌Watt，維拿迪馬愛華頓最叻打守勢波，尤其主場出擊喺初段零舍保守，今仗遇強更加不敢冒進，半場和值得再追。
（周六早上6時開賽）

高路高路聯賽表現下滑
高路高路於近兩仗智盃及南球盃全勝兼狂轟7粒，但與盃賽相比，聯賽表現明顯有回落迹象，近7仗聯賽只得3勝3和1負，包括近兩仗接連打和奧希金斯及紐柏萊斯，之前銳不可當嘅氣勢冇晒，喺聯賽榜畀紐柏萊斯、艾斯賓路拿愈追愈貼。由於高路高路依家喺聯賽、智盃及南球盃3線作戰，對體能亦係一大考驗，被迫輪換難免影響表現。

維拿迪馬愛華頓只係位處聯賽中游，上周更喺智盃畀馬加蘭斯踢出局，加上南球盃分組賽亦遭淘汰，依家只需應付聯賽，體能消耗比高路高路少。維拿迪馬愛華頓甚少輸波，今季15仗聯賽4勝8和3負，佢哋只係失咗12粒，係失波第2少球隊之一，反映出佢哋非常注重防守。維拿迪馬愛華頓主場一樣打守勢波，尤其係初段例擺鐵桶陣，各項賽事近7次主場出擊，有6次半場同對手打和，而呢6仗半場全部互交白卷，可見佢哋以先求半場不敗為大前提，半場和不妨追多鋪。