水手全力衝冠摧花冇手軟|東方日報

水手全力衝冠摧花冇手軟
2022/07/10文:法達斯維

今晚日職重頭戲，大阪櫻花主場迎戰橫濱水手，櫻花雖然位居前列，但水準極為飄忽，包括主場對護級分子清水心跳都贏唔到，表現令人失望。橫濱水手正在全力爭標，挾近6場聯賽全勝之勢，讓平半一於捧上盤。（有線661及601台周日晚6時直播）

櫻花近況跌晒watt
櫻花早前踢出6連勝強勢，但近期已經無以為繼，包括聯賽輸畀廣島三箭，最離譜係主場迎戰弱隊清水心跳，上半場已經落後，最終僅逼和1比1，上周中作客鹿島鹿角一度反先之下，最終被逼和3比3再次失分，削弱爭標機會，難免對士氣造成打擊。櫻花今季10場聯賽主場失咗12球，當中只有1場保持清白之身，遇上來勢洶洶嘅水手，恐怕防線難以招架。

另一邊廂，水手上場大數廣島三箭3比0後，聯賽豪取6連勝狂轟18粒，當中近3場聯賽作客贏晒，前鋒里奧施亞拉、西村拓真等腳風非常順，里奧施亞拉更有6球進帳，包括作客贏心跳5比3之役，佢大演帽子戲法，弗到冇朋友，今仗有力反客為主，正所謂寧買當頭起，水手個勢咁旺梗係繼續追喇。