拜仁實力超班劈「錫」搶盃|東方日報

除咗英格蘭社區盾，今日仲有德超盃、荷超盃同葡超盃為歐洲新球季「暖身」。其中德超盃由RB萊比錫主場鬥拜仁慕尼黑，上屆德國盃盟主RB萊比錫熱身賽表現麻麻，球員明顯未上力；德甲10連冠嘅拜仁實力超班，教練拿高士文對前球會RB萊比錫熟到透，加上近3次對賽全勝，客Ｗ抵玩。

（周日凌晨2時30分開賽）
RB萊比錫近年不斷面對主力流失問題，上季德甲勉強獲得第4攞到歐聯入場券，但今夏備戰工作麻麻，早前熱身賽主場竟以0比5大敗於利物浦腳下，防線錯漏百出，遇上攻力強勁嘅拜仁，情況並唔樂觀。拜仁引入沙迪奧文尼頂替離隊嘅羅拔利雲度夫斯基，呢位塞內加爾國腳喺季前熱身賽演出對辦，包括對華盛頓聯隊貢獻一球及一次助攻，防線上亦簽入荷蘭中堅馬菲斯迪歷特，實力有增無減。拜仁過去6屆德超盃5次奪冠，今仗可反客為主，推介大家玩客Ｗ。

葡超盃波圖大盤「拉」唔住
至於荷超盃同葡超盃，荷超盃由阿積士鬥燕豪芬，一眼望落去都覺得會係大手交易，不過兩隊近5次碰頭4次半場開1球或以下，可試1.5球半場細。（周日凌晨2時開賽）葡超盃由波圖火併唐迪拉，波圖贏波係基本任務，主要係贏幾多同幾時開始入波，讓球主客和「-2」又辣得滯，睇番雙方近3次對賽，總入球全開4球，不如玩3.5球入球大。（周日凌晨3時45分開賽）