富明尼斯當弗夠贏山度士|東方日報

周二早上有巴甲獨腳戲，山度士（圖右）主場迎戰富明尼斯，爭標份子富明尼斯表現勢如破竹，近7場聯賽取得6勝1和，力追榜首彭美拉斯，預料今仗作客都會照搶攻。山度士近期頻頻失分，恐怕難以招架，今場開平手盤，必然揀客隊富明尼斯。（周二早上7時開賽）

富明尼斯季初成績欠佳，會方果斷換帥，請來48歲嘅迪尼斯回巢領軍，效果立竿見影，球隊表現愈來愈好，各項賽事近10場贏9場，包括上仗巴西盃8強首回合作客擊敗福塔雷薩。富明尼斯戰績彪炳，除咗主帥迪尼斯領導有方之外，前鋒謝文卡奴亦應記一功，佢今季聯賽已經有12球進帳，排射手榜第1位，富明尼斯有呢位大勇嘅34歲阿根廷射手在陣，今仗有力反客為主。
山度士攻力疲弱

至於山度士今季踢19場聯賽僅6勝，贏波率偏低，好大程度上由於攻力不足，導致成績長期冇起色，其中近3場聯賽有2場未能取得入球，恐怕今場隨時又捱打，追捧處於強勢嘅富明尼斯，比較划算。