屈福特超班平手盤抵玩|東方日報

今晚英冠重頭戲，西布朗主場鬥屈福特。屈福特今季由英超降班後，留得住多位主力，首輪亦有出色表現，粉碎外界對佢哋鬥心不足嘅疑慮。論陣容屈福特喺英冠屬頂尖級別，今晚對住實力一般嘅西布朗，有力繼續贏波，平手盤必定捧屈福特。（有線601及661台周二凌晨3時直播）

西布朗不進反退
屈福特前線三叉戟艾曼紐丹尼斯、伊斯美拿沙亞及祖奧柏度均屬英超水平，上仗3人聯手正選上陣表現突出，最終憑祖奧柏度一箭定江山，主場以1比0擊敗強敵錫菲聯。「大黃蜂」正選陣容同上季分別唔大，中場湯卡華利及後防卡夫卡特等繼續領軍，實力有保證，今季以重返英超為目標，就算作客都會採取主動。

主隊西布朗上季一度挑戰升班資格，但年初改聘布魯士執教後，成績不進反退，最終只排第10位。西布朗上仗作客米杜士堡，喺劣勢下只能搶到1分，表現未如人意。翻查對賽往績，兩隊過去3次聯賽交鋒，屈福特錄得2勝1和成績，今場有力反客為主，平手盤抵玩到極。