學生隊恰到帕拉尼恩斯|東方日報

8強次回合藉地利發圍

聽朝自由盃8強次回合，阿甲老牌球隊學生隊，主場迎戰巴甲嘅帕拉尼恩斯。首回合互交白卷，不過學生隊主場打自由盃特醒，對住今屆自由盃客場未贏過嘅帕拉尼恩斯，可藉地利贏波晉級，讓平半照捧上盤。

（myTVSUPER周五早上8時30分直播）
學生隊於阿甲表現奇差，開咧後12仗聯賽贏得3仗咁大把，但佢哋明顯將目標放喺自由盃，暫時將聯賽寓賽於操，首回合造訪帕拉尼恩斯，踢得比較保守，最終打和0比0。學生隊出戰淘汰賽，採取「客場唔輸、主場爭勝」策略，自由盃16強對住福塔雷薩，咁啱都係先客後主，佢哋作客先打和1比1，返主場則大勝3球晉級，而且連同外圍賽及分組賽在內，學生隊今屆自由盃6次主場出擊，全部贏晒，難怪佢哋打算返主場先嚟料。

帕軍客場例腳軟
另一邊廂，帕拉尼恩斯客場表現一般，各項賽事近5仗作客，只得1勝2和2負，如果只計自由盃客場，連同分組賽在內，今屆4仗僅得2和2負未贏過，只入1粒，其中3仗更食白果，每逢作客都腳仔軟，造訪主場特醒嘅學生隊，凶多吉少。