羅馬穩陣波半和最拿手|東方日報

今晚意甲矚目賽事，沙蘭力坦拿主場迎戰羅馬。由名帥摩連奴執教嘅羅馬上季勇奪歐協聯冠軍，今季繼續積極增兵，陣容有唔少變動，估計需要時間磨合，加上呢支首都球隊向來比較慢熱，近4季聯賽開咧戰僅曾2勝，其中有3次上半場同對手打和，今場一於再追半場和。（Now638周一凌晨2時45分直播）

羅馬今夏主要簽入3位球星保羅戴巴拿、尼曼查馬迪及韋拿杜姆，另外里爾後衞薛基施歷亦告加盟，前中後三線人腳實力都有所增強。不過同時間太多新兵來投，球員間默契難免不足；為免先失波跌落下風，一向作風穩健嘅教頭摩連奴，預料今仗作客會先採取保守戰術，等球員熱身適應、站穩陣腳之後，再以積極踢法搶攻爭勝。

沙蘭力坦拿主場頂得住
至於沙蘭力坦拿上季中途改由尼高拿接手執教後，表現開始發力，最後奇迹護級成功，可見呢位49歲少帥教波功力唔簡單。39歲法國老將列貝利仍然在陣，不過體力大不如前，沙蘭力坦拿亦向友會森多利亞，正式買斷前鋒費達歷高邦拿索尼，此子上季意甲攻入10球，並非等閒之輩。沙蘭力坦拿有地利優勢，加上上半場體力充沛之下，應該有力同羅馬抗衡，半場和機會甚高。