貝迪斯將士用命 主場出擊可再勝|東方日報

星期六凌晨西甲賽事，貝迪斯主場迎戰奧沙辛拿，兩隊開季同樣連贏兩仗。貝迪斯喺多位主力仍未可以註冊下，憑住上下一心踢出佳績，表現相當難得，呢支上季第5名球隊本身實力強勁，加上教練比歷連尼執教下攻守兼備，主場有力擊退奧沙辛拿，主勝值得支持。

（now632周六凌晨4時直播）
貝迪斯因財政問題困擾，祖亞昆、哥迪奧巴禾、古亞達度等續約球星，加上新簽嘅韋利安荷西等仍未能註冊，未能以最強陣容出戰，不過貝迪斯始終實力強橫，陣中仍有費基亞、保查艾利斯亞斯等球星孭飛，當中保查艾利斯亞斯開季兩仗已經入咗3球，狀態大勇，火力夠晒保證。

近5交手奧沙辛拿全敗

奧沙辛拿開季連贏西維爾同卡迪斯，不過兩仗都係喺主場出擊，球隊近7場聯賽作客只有1勝，作客未能予球迷信心。睇番過去5次交鋒，全部都係貝迪斯贏波，「格食格」之下今場必捧主勝。