祖記分心歐聯細盤手到拿來|東方日報

今晚意甲壓軸好戲，由祖雲達斯主場迎戰沙蘭力坦拿。祖記傷兵滿營令攻力跌Watt，而且有歐聯後顧難免避重就輕，沙蘭力坦拿踢法硬淨唔易食，2.5球入球細可取。（Now638周一凌晨2時45分直播）

祖記開季頭頭碰着黑，今夏回巢嘅保羅普巴上周進行手術根治膝傷，預計下年1月先可歸隊，連年尾嘅世盃都好大機會缺席，令主帥阿里基以呢位法國國腳做核心嘅如意算盤打唔響。祖記中場群龍無首，近4仗聯賽全開2球或以下，其中上輪聯賽對費倫天拿早早領先，點知最終都被逼和1比1，可見阿帥保守到暈。

祖記上周中歐聯作客以1比2不敵巴黎聖日耳門，不過對手太強非戰之罪，阿里基講明目標放喺嚟緊周中次輪對賓菲加嘅大戰，為爭出線呢3分相當緊要，今仗祖記隨時留有一手。

沙蘭力坦拿防守有改善
沙蘭力坦拿儘管有名將列貝利因傷倦勤，但開季表現唔曳，頭5輪聯賽取得1勝3和僅1敗，其中3仗開2球或以下，防守有明顯改善，加上備戰時間充足，有力同要分心歐聯嘅祖記周旋，既然祖記守強攻弱，捧入球細好過。