羅馬穩陣細盤基不可失|東方日報

羅馬喺今晚歐霸盃C組主場迎戰赫爾辛基。兩隊首輪都輸波而回，論實力羅馬當然優於對手，不過考慮到賽程緊密，加上羅馬教練摩連奴屬「現實主義者」，隨時贏到就算，主Ｗ太熱冇肉食，轉吼中位數3.5球嘅細盤。（Now644周五凌晨3時直播）

羅馬上輪分組賽踢到88分鐘臨尾香，作客1比2不敵保加利亞球隊盧多格德斯，令人跌眼鏡，相信佢哋吸取教訓後，今仗會打醒十二分精神，避免重蹈覆轍。加上以摩連奴嘅穩健作風，今仗一旦取得領先優勢，好大機會採取「拉布戰術」，一來唔畀機會對手扳平，二來可以節省體力，佢哋下場意甲仲要同阿特蘭大合演前列大戰，今場歐霸盃未必去盡，好可能小勝收工。
赫爾辛基歐戰保守

芬蘭球隊赫爾辛基實力平平無奇，上輪分組賽主場都以0比2不敵西甲貝迪斯，擺明同歐洲5大聯賽球隊有明顯差距，今仗作客更加難踢，只能主守希望攞到1分。佢哋踢歐洲賽作風保守，近5場歐霸盃總入球全開2球或以下，入球細值得追捧。