羅渣士救命戰！李城細守熱刺|東方日報

周中歐聯嘗到今季首敗嘅熱刺，今晚將會主場迎戰包尾嘅李斯特城。熱刺開季戰績理想，英超6仗錄得4勝2和佳績，相反李斯特城5連敗後僅得1分墊底，士氣差天共地。不過熱刺嘅進攻戰術比較單調，而且中場創造力不足，想攻破以1分為目標嘅李斯特城並唔容易，博中位數2.5球入球細更加好分。
（Now621及611周日凌晨零時30分直播）

哈利卡尼獨力難撐
熱刺今季加入李察利臣，配合哈利卡尼、孫興民等前鋒組成星級鋒線，不過踢落就展現唔出預期威力，上季英超金靴孫興民今季仲未入過波，表現受到批評。領隊干地嘅反擊戰術亦嫌單調，前線入波及創造都靠哈利卡尼一人支撐，周中歐聯慘吞士砵亭兩蛋後，熱刺近6場比賽有5場總入球為2球或以下，足證攻力麻麻。

作客嘅「狐狸」李斯特城深陷降班危機，佢哋今夏有多位主力離隊，但未見增兵安排，經歷聯賽5連敗後，今季6仗只得1分排包尾。領隊羅渣士盛傳將被炒魷，為保帥位今場唔可以再輸，作客會以1分為目標，用番最擅長嘅穩守突擊戰術，預料今場戰況會陷入拉鋸，開入球細機會高。